ამბები
სიახლე
ბლოგი
ღონისძიებები
-
საერთაშორისო სამედიცინო კონფერენცია - დუშენის კუნთოვანი დისტროფია -
ახალი ეროვნული კამპანია – „შენ გარეშე არ გამოვა“ -
"ბორჯომის“ ახალი ჩამომსხმელი ქარხანა გაიხსნა
საერთაშორისო სამედიცინო კონფერენცია - დუშენის კუნთოვანი დისტროფია
25 ოქტომბერს, საქართველოში გაიმართა საერთაშორისო სამედიცინო კონფერენცია თემაზე: „დუშენის კუნთოვანი დისტროფია: კლინიკური პრაქტიკა, ადგილობრივი საჭიროებები და გლობალური პერსპექტივები". ღონისძიება მოაწყო საერთაშორისო ფარმაცევტულმა კომპანია Biomedica-მ და გახდა მნიშვნელოვანი პლატფორმა ადგილობრივ და საერთაშორისო სამედიცინო სფეროს შორის გამოცდილებისა და ცოდნის გასაზიარებლად.
კონფერენციაზე საზღვარგარეთიდან სპეციალურად მოწვეულმა პროფესორებმა ქართველ კოლეგებს გააცნეს დუშენის კუნთოვანი დისტროფიის მკურნალობის ინოვაციური მიდგომა, კერძოდ ეგზონის გამოტოვების თერაპია (Exon Skipping Therapy). ეს მეთოდი წარმოადგენს თანამედროვე სამედიცინო მეცნიერების ერთ-ერთ პერსპექტიულ მიღწევას აღნიშნული დაავადების მართვის სფეროში.
ღონისძიებაში მონაწილეობდნენ საერთაშორისო ფარმაცევტული კომპანიების წარმომადგენლები, სპეციალურად მოწვეული უცხოელი პროფესორები, ადგილობრივი სამედიცინო სპეციალისტები, საქართველოს ჯანდაცვის სამინისტროსა და პარლამენტის ჯანდაცვის კომიტეტის წარმომადგენლები, ასევე პაციენტთა ორგანიზაციის წევრები. შეკრებილმა სპეციალისტებმა იმსჯელეს დაავადების კლინიკური მართვის გამოწვევებზე, პაციენტების წინაშე მდგარ პრობლემებსა და მკურნალობის თანამედროვე შესაძლებლობებზე.
ახალი ეროვნული კამპანია – „შენ გარეშე არ გამოვა“
საქართველოს დაუნის სინდრომის ასოციაციამ კაფე „მზიურში“ საზოგადოებას „თვითადვოკატების პოდკასტები“ და ახალი ეროვნული კამპანია – „შენ გარეშე არ გამოვა“ წარუდგინა.
ღონისძიებაზე დამსწრე საზოგადოება ინოვაციური პოდკასტ-პლატფორმას გაეცნო, სადაც დაუნის სინდრომის მქონე ახალგაზრდები საკუთარი სიტყვებით გვიზიარებენ გამოცდილებას, ისტორიებს და საუბრობენ საკუთარ გამოცდილებაზე. პროექტის მიზანია საზოგადოებაში მათი ხმის გაძლიერება, ცნობიერების ამაღლება და სტიგმის დაძლევა.
პოდკასტების პრეზენტაციის პარალელურად, ასოციაციამ ოფიციალურად დააანონსა ეროვნული კამპანია „შენ გარეშე არ გამოვა“. ინიციატივა მიზნად ისახავს ოჯახების, საზოგადოების და ბიზნეს სექტორის გაერთიანებას, რესურსების მობილიზებასა და იმ მხარდაჭერის გაძლიერებას, რომელიც აუცილებელია განვითარების, განათლებისა და ჯანმრთელობის ხელმისაწვდომობისთვის.
"ბორჯომის“ ახალი ჩამომსხმელი ქარხანა გაიხსნა
IDS ბორჯომი საქართველომ, როგორც დარგის ლიდერმა და ნოვატორმა კომპანიამ, პირველი ქართული მინერალური წყლის „ბორჯომის“ წარმოების 135-ე წელს, თანამედროვე ტექნოლოგიებით აღჭურვილი ახალი ქარხანა გახსნა. პროექტის ჯამური ინვესტიცია 120 მილიონი დოლარია. ღონისძიებას საქართველოს აღმასრულებელი, საკანონმდებლო, ადგილობრივი ხელისუფლების წევრები და ბიზნესის წარმომადგენლები დაესწრნენ.
ბორჯომის ახალი ქარხანა აშენდა ყვიბისში, ყოფილი, N2 ჩამომსხმელი ქარხნის ტერიტორიაზე. საწარმოს საერთო ფართობი 48 000 მ2-ს შეადგენს. მასშტაბითა და წარმოების შესაძლებლობებით, საქართველოში ის ყველაზე დიდია ჩამომსხმელ სექტორში. საწყის ეტაპზე ქარხნის სიმძლავრე 750 მილიონი ბოთლია წელიწადში, ხოლო 2030 წლისთვის მილიარდ ბოთლამდე მიაღწევს.
